កុមារា Jude Owens ដែលមានវ័យទើបតែ ២ឆ្នាំ បានបំបែកកំណត់ត្រាពិភពលោក Guinness World Record លើ ឯតទគ្គកម្មថ្មីចំនួន ២ ក្លាយជាកុមារក្មេងបំផុត មានសមត្ថភាពអាចបុកគ្រាប់ប៊ីយ៉ាស្នូកឃ័របញ្ចូលឡូ។
ត្រឹមតែអាយុ ២ឆ្នាំ និង ៣០២ថ្ងៃប៉ុណ្ណ៉ោះ កុមារា Jude Owens ដែលរស់នៅក្នុងទីក្រុង Manchester ប្រទេសអង់គ្លេស ទទួលបានសមិទ្ធផលដ៏ធំសម្បើមចំនួន ២ រួចបាត់ទៅហើយ កាលពីឆ្នាំ២០២៥ កន្លងទៅ។ Owens បាន ក្លាយជាអ្នកលេងកីឡាប៊ីយ៉ាស្នូកឃ័រ វ័យក្មេងបំផុត ដែលអាចប្រើក្បាច់បុកគ្រាប់ប៊ីយ៉ាពណ៌ខ្មៅបកត្រឡប់ក្រោយ បញ្ចូលឡូយ៉ាងល្អ និងបានបុកគ្រាប់ប៊ីយ៉ាស្នូកឃ័របញ្ចូលឡូ ២គ្រាប់ បានក្នុងពេលតែមួយ។
សកម្មភាពឯតទគ្គកម្មរបស់ កុមារ Owens ត្រូវបានប្រកាសទទួលស្គាល់ពីសំណាក់ស្ថាប័នកំណត់ត្រាពិភពលោក Guinness World Record កាលពីថ្ងៃទី២៨ ខែមករា ឆ្នាំ២០២៦។
ដោយឡែក លោក Luke Owens ឪពុករបស់កុមារវ័យ ២ឆ្នាំ រូបនេះ បានបង្ហាញអារម្មណ៍រំភើបខ្លាំងចំពោះទេពកោសល្យដ៏ពិសេសដែលកូនរបស់លោកមាន។ បុរសជាឪពុកដដែលថា៖«កូនប្រុសរបស់ខ្ញុំមានទេពកោសល្យ នេះ តាំងពីកំណើត នៅពេលខ្ញុំឃើញគេចូលលេងប៊ីយ៉ាស្នូកឃ័រ ត្រឹមវ័យ ២ឆ្នាំនេះ »។។
ឪពុកកុមារ Owens បន្ថែមថាក៏មានភ្ញាក់ផ្អើលពេលដែលវីដេអូបង្ហោះទាក់ទងសកម្មភាពបុកប៊ីយ៉ាស្នូកឃ័ររបស់កូន ប្រុស ផ្ទុះការចាប់អារម្មណ៍ខ្លាំងលើបណ្តាញសង្គម។ ជូនកាលថែមទាំងមានប្រព័ន្ធផ្សព្វផ្សាយបណ្តាញសង្គមធំៗ ជាច្រើនបានទាក់ទងស្នើសុំទិញ ឬប្រើប្រាស់នូវសកម្មភាពរបស់ Jude Owens។
ដោយឡែក លោក Craig Glenday និពន្ធនាយករបស់ស្ថាប័ន Guinness បានចាត់ទុកសមិទ្ធផលរបស់កុមារ Owens ថាជារឿងដ៏ពិសេសអស្ចារ្យបំផុតមួយ មិនធ្លាប់មាន៕
